ხელმომწერი ორგანიზაციები, ვეხმაურებით ბოლო დღეებში უზენაესი სასამართლოს მოსამართლეთა კანდიდატურების წარდგენის და მასთან დაკავშირებულ მოვლენებს. საქართველოს პარლამენტის გადაწყვეტილებით, იუსტიციის უმაღლესი საბჭოს მიერ წარდგენილ კანდიდატებზე მსჯელობა წარიმართება პარლამენტის საგაზაფხულო სესიაზე.
მისასალმებელია, რომ კანდიდატთა განხილვის გადადება, მეტწილად, შესაძლებელი გახდა იურიდიული კომიტეტის თავმჯდომარის, ეკა ბესელიასა და პარლამენტის წევრთა მცირე ნაწილის პრინციპული პოზიციების დაფიქსირების შედეგად.
თუმცა, საგანგაშოა, რომ, განსხვავებული პოზიციების დაფიქსირების გამო პარლამენტის იურიდიული კომიტეტის თავმჯდომარეს, თანამდებობის დატოვება უწევს. აღნიშნული კიდევ ერთხელ ცხადყოფს, რომ მმართველ პოლიტიკური ძალას არ აქვს პოლიტიკური ნება, განახორციელოს სასამართლო ხელისუფლების ძირეული რეფორმა და სისტემური ცვლილებები. შედეგად, სასამართლო კვლავ რჩება პირთა ვიწრო ჯგუფის გავლენის ქვეშ.
მიგვაჩნია, რომ სასამართლო რეფორმის წარუმატებლობასა და სასამართლო მმართველობაში კლანური სისტემის გაძლიერებაზე პასუხისმგებლობა სრულად ეკისრება მმართველ პოლიტიკურ ძალას. ამის კიდევ ერთი გამოვლინებაა იუსტიციის უმაღლესი საბჭოს მიერ მოსამართლე ლევან მურუსიძის თანამდებობაზე უვადოდ გამწესება.
შესაბამისად, ამ ეტაპზე, კრიტიკულად მნიშვნელოვანია, უზენაესი სასამართლოს კანდიდატთა არჩევა განხორციელდეს ღია, საჯარო და გამჭვირვალე საპარლამენტო პროცედურით. მხოლოდ ასეთი პროცესი უზრუნველყოფს, რომ მოსამართლის თანამდებობა დაიკავონ კეთილსინდისიერმა, კვალიფიციურმა და მიუკერძოებელმა მოსამართლეებმა.
ხელმომწერი ორგანიზაციები:
- საერთაშორისო გამჭვირვალობა
- სამართლიანი არჩევნები
- საქართველოს დემოკრატიული ინიციატივა
- პარტნიორობა ადამიანის უფლებებისთვის
- კონსტიტუციის 42-ე მუხლი
- კავშირი საფარი
- მწვანე ალტერნატივა
- ღია საზოგადოების ფონდი
- ინფორმაციის თავისუფლების განვითარების ინსტიტუტი
- ეკონომიკური პოლიტიკის კვლევის ინსტიტუტი
- ადამიანის უფლებების სწავლებისა და მონიტორინგის ცენტრი
მოვლენათა ქრონოლოგია
ახალი პრეზიდენტის ინაუგურაციის მეორე დღიდან, 17 დეკემბრიდან ძალაში შევიდა კონსტიტუციის ახალი რედაქცია, რომლის მიხედვითაც საქართველოს უზენაესი სასამართლოს მოსამართლეებს პრეზიდენტის ნაცვლად, იუსტიციის უმაღლესი საბჭო წარადგენს და მათ თანამდებობაზე უვადოდ აირჩევს საქართველოს პარლამენტი.
უზენაესი სასამართლოს თავმჯდომარეც ამავე წესით 10 წლის ვადით აირჩევა.
- 17 დეკემბერი- მართლმსაჯულების კოალიციის განცხადება მოსამართლეებისა და თავმჯდომარის შესარჩევი პროცესის კანონმდებლობით დარეგულირებასთან დაკავშირებით
- 24 დეკემბერს საქართველოს იუსტიციის უმაღლესმა საბჭომ საქართველოს პარლამენტს უზენაესი სასამართლოს მოსამართლეობის კანდიდატები წარუდგინა
- 24 დეკემბერი- არასამთავრობო ორგანიზაციების ერთობლივი განცხადება: სამოქალაქო სექტორი პარლამენტისგან უზენაესი სასამართლოს დაკომპლექტების შეჩერებას მოითხოვს
- 24 დეკემბერი- ნაზი ჯანეზაშვილის პერფორმანსი 2 თვის ჩვილთან ერთად, რომლითაც მან მოსამართლეების უვადოდ დანიშვნის პრობლემა დაანახა საზოგადოებას
- 25 დეკემბერი- საზოგადოების მიმართვა პარლამენტს წარდგენილ კანდიდატთა არჩევის თაობაზე
- 26 დეკემბერი- სახალხო დამცველის განცხადება
- 26 დეკემბერი- ადვოკატთა ასოციაციის განცხადება
- 26 დეკემბერი- იუსტიციის საბჭოს განცხადება პროცესთან დაკავშირებით
- 26 დეკემბერი- დახურული შეხვედრა ღია საზოგადოების ფონდში ყოფილ მოსამართლეებს, ადვოკატებს და უფლებადამცველებს შორის.
- 26 დეკემბერი- ირაკლი კობახიძის განცხადება განხილვის საგაზაფხულო სესიამდე გადადების თაობაზე
- 26 დეკემბერი- სამი წლის ვადით გამწესებულ მოსამართლეებთან გასაუბრების დანიშვნა 27 დეკემბერს, მათ შორის ლევან მურუსიძესთან
- 27 დეკემბერი- ეკა ბესელიამ პარლამენტის იურიდიული კომიტეტის თავმჯდომარის პოსტი დატოვა
- 27 დეკემბერი- ლევან მურუსიძე სააპელაციო სასამართლოში უვადოდ დაინიშნა მოსამართლედ