26 დეკემბერს, ღია საზოგადოების ფონდის და ადამიანის უფლებათა სწავლებისა და მონიტორინგის ცენტრის (EMC) ორგანიზებით უზენაესი სასამართლოს დაკომპლექტების საკითხთან დაკავშირებით გაიმართა დახურული შეხვედრა არასამთავრობო ორგანიზაციებს, ადვოკატებს, ყოფილ მოსამართლეებსა და უფლებადამცველებს შორის. 24 დეკემბერს, იუსტიციის უმაღლესი საბჭოს მიერ საქართველოს პარლამენტისთვის უზენაესი სასამართლოს მოსამართლეობის კანდიდატების წარდგენას არასამთავრობო ორგანიზაციების დიდი ნაწილი იმავე დღეს გამოეხმაურა.
შეხვედრის მონაწილეებმა სასამართლოში შექმნილი ვითარება განიხილეს და უზენაესი სასამართლოს დაკომპლექტების პროცესში არსებული ხარვეზებზე იმსჯელეს. მათი შეფასებით, უზენაესი სასამართლოს მოსამართლეების დაკომპლექტების პროცესი გაუმჭვირვალედ მიმდინარეობს. შეინიშნება „კლანის გაძლიერების“ და კორუფციის საფრთხე. ამ გარემოებას ხელს უწყობს იუსტიციის საბჭოს განუსაზღვრელი დისკრეცია, რასაც მას ახალი კონსტიტუცია ანიჭებს. შეხვედრის ერთერთი მონაწილის შეფასებით
„ეს პროცესი ხალხისთვის ძალაუფლების მოპარვის მცდელობაა“.
შეხვედრის პარალელურად გავრცელდა ინფორმაცია, რომ პარლამენტი აღნიშნული საკითხის განხილვას საგაზაფხულო სესიამდე გადადებს. პარლამენტის თავმჯდომარის განცხადებიდან რამდენიმე წუთში კი ცნობილი გახდა, რომ იუსტიციის საბჭომ სამი წლის ვადით გამწესებულ მოსამართლეებთან 27 დეკემბერს გასაუბრება დანიშნა. გასაუბრების კანდიდატებს შორის არის ლევან მურუსიძეც.
შეხვედრის მონაწილეები საერთო ხედვაზე შეთანხმდნენ და სამომავლო გეგმები განიხილეს. მათი თქმით, ეს საკითხი უახლოეს მომავალში გასცდება პროფესიულ წრეს და ფართო საზოგადოებრივი მსჯელობის საგანი გახდება.
მოვლენათა ქრონოლოგია
ახალი პრეზიდენტის ინაუგურაციის მეორე დღიდან, 17 დეკემბრიდან ძალაში შევიდა კონსტიტუციის ახალი რედაქცია, რომლის მიხედვითაც საქართველოს უზენაესი სასამართლოს მოსამართლეებს პრეზიდენტის ნაცვლად, იუსტიციის უმაღლესი საბჭო წარადგენს და მათ თანამდებობაზე უვადოდ აირჩევს საქართველოს პარლამენტი.
უზენაესი სასამართლოს თავმჯდომარეც ამავე წესით 10 წლის ვადით აირჩევა.
- 17 დეკემბერი- მართლმსაჯულების კოალიციის განცხადება მოსამართლეებისა და თავმჯდომარის შესარჩევი პროცესის კანონმდებლობით დარეგულირებასთან დაკავშირებით
- 24 დეკემბერს საქართველოს იუსტიციის უმაღლესმა საბჭომ საქართველოს პარლამენტს უზენაესი სასამართლოს მოსამართლეობის კანდიდატები წარუდგინა
- 24 დეკემბერი- არასამთავრობო ორგანიზაციების ერთობლივი განცხადება: სამოქალაქო სექტორი პარლამენტისგან უზენაესი სასამართლოს დაკომპლექტების შეჩერებას მოითხოვს
- 24 დეკემბერი- ნაზი ჯანეზაშვილის პერფორმანსი 2 თვის ჩვილთან ერთად, რომლითაც მან მოსამართლეების უვადოდ დანიშვნის პრობლემა დაანახა საზოგადოებას
- 25 დეკემბერი- საზოგადოების მიმართვა პარლამენტს წარდგენილ კანდიდატთა არჩევის თაობაზე
- 26 დეკემბერი- სახალხო დამცველის განცხადება
- 26 დეკემბერი- ადვოკატთა ასოციაციის განცხადება
- 26 დეკემბერი- იუსტიციის საბჭოს განცხადება პროცესთან დაკავშირებით
- 26 დეკემბერი- ირაკლი კობახიძის განცხადება განხილვის საგაზაფხულო სესიამდე გადადების თაობაზე
- 26 დეკემბერი- სამი წლის ვადით გამწესებულ მოსამართლეებთან გასაუბრების დანიშვნა 27 დეკემბერს, მათ შორის ლევან მურუსიძესთან
- 27 დეკემბერი- ეკა ბესელიამ პარლამენტის იურიდიული კომიტეტის თავმჯდომარის პოსტი დატოვა
- 27 დეკემბერი- ლევან მურუსიძე სააპელაციო სასამართლოში უვადოდ დაინიშნა მოსამართლედ